Għamilli borża chips....please!

Ma niftakarx s-sena eżatt pero naf li kont fl-ewwel snin bikrin tas-Sekondarja.  Ftit ġranet wara li bdew il-vaganzi tas-Sajf, konna iddeċidejna grupp żgħir li noqogħdu kollha fl-istess akwati, sabiex immorru ġurnata baħar.  Xejn kbir... ninżlu sa Birżebbuġa b'tal-linja, u hemm inqattaw ħin ngħumu u logħob bil-ballun, li għalina kienu jfissru ħafna.

Magħna kien ġie wieħed li konna nsejħulu 'Rombu', li ma kien xejn ħlief taħlita bejn l-isem 'Rambo' (karattru mitiku tas-snin tmenin) u Romblu, minħabba li kien tifel mbaċċaċ mhux ħażin u li għal żaqqu kien jagħmel kollox.

Ma konna nġorru xejn ta' barra minn hawn magħna.  Ħafna drabi xugaman, ballun, xi flixkun tal-plastik bl-ilma ffriżat (kienet moda dak iż-żmien!), u ftit ċenteżmi kemm naqbdu tal-linja 'l hemm u lura.  Pero, f'dik il-ġurnata baħar għamilna minn kollox.  Li konna hemm waħidna, meta konna normalment immorru baħar biss mal-ġenituri, kien diġa ħafna.  Hemm ma waqafniex sekonda telgħin mal-moll u naqbżu qisna żrinġijiet f'dak il-baħar kaħlani.  Il-bajja kienet ferm iżgħar minn tal-llum u li tgħum mal-moll kien assoċjat li qed tgħum bħal kbar, u mhux mar-ramla bħal l-oħrajn li issa għax bdejna Sekondarja sirna narawhom tfal!

Mela ħin bla waqt, u f'xemx tiżreġġ u taqli l-ankri, ir-Rombu bdiet tgergirlu żaqqu u beda jara x'ser jiekol.  Bħalna ma ġarx ħafna flus miegħu.  Sadanitant, minn gabbana fqira fil-viċin bdiet gejja riħa ta' chips moqli fiż-żejt, li r-Rombu aktar tefgħatu f'dillirju li jrid jiekol xi ħaġa u malajr.  Ferneżija li ma kellux flus biżżejjed sabiex jixtri borża chips, tant li beda jara kif ser jiddubhom.  Butna kien gwapp aktar minn tiegħu, u forsi kien iddobba ftit, imma mhux il-ħmistax il-ċenteżmu li kellu bżonn għal dik il-borża ta' aktar żejt milli chips.

Ra kif għamel u beda jdur in-nies tal-bajja u jittallab għal ċenteżmu, bl-iskuża li jrid jaqbad tal-linja u ma kellux flus.  Naqra naqra ġabar biżżejjed sabiex jixtri borża chips, u jaqta' t-tgergir ta' żaqqu, li sa dak il-ħin il-ħoss kien diġa beda jinstema' ġmielu.  B'ġirja qisu sajjetta, mar dritt lejn il-gabbana, u bl-leħen oħxon imma edukat qallu 'Għamilli borża chips.... please!'.  Dħakna mhux ftit narawh ġej b'dik il-borża tqattar iż-żejt, u hu jaħtaf kull waħda f'nifs wieħed.  Ta' edukat li kien, offra lil kulħadd, speċjalment dawk minna li tawh xi ħaġa tal-flus, sabiex jaqta' dak il-ġuħ.  Aħna aktar nidku milli nieklu, għax ir-Rombu reġa għamilha!

Mela dan l-aħħar nżilt nara l-logħob tan-nar ta' raħal twelidi, il-Fgura.  Intfajt għal kwiet fuq ċint eżatt ħdejn gabbana tal-ikel ultra-moderna, nara dak it-talent ta' xogħol fin-nar waqt li quddiemu kien hemm il-briju u l-entużjażmu ta' żgħażagħ Fgurin għatxana sabiex jagħmlu festa aqwa minn tas-sena ta' qabel.

F'ħin minnhom, fost t-tisfir u twerżieq tal-murtaletti u sfafar tan-nar, nisma' lil xi ħadd jgħid lil tal-gabbana... "Għamilli borża chips....please".  Dak il-kliem bħal donnu kien familjari, u dlonk dawwart wiċċi ħalli nara min kien.  Eżatt quddiemi erġajt rajt lir-Rombu, issa raġel mdaqqas u għadu mimli kif nafu.  L-edukazzjoni u l-manjieri ħelwin tiegħu għadhom fuqu, u f'sekonda għajnejna ltaqaw u għarafni.  Ma bsartx li ser jarafni imma ġie riħ biex ikellimni, qisu qed jarani barra l-iskola u mhux għaddew dawn is-snin kollha.

Ġie fuqi u b'ħalqu mimli, qalli... "Kif aħna?... x' minnek?.... bil-ħaqq...trid chips?"  Risposta tiegħi ħadha, pero ħa ukoll tbissima lura għax b'dik it-'trid chips', ħadni lura snin twal ilu, u nebbaħni bla ħsieb li nikteb din it-tifkira.  Grazzi Rombu..għax naf li ma jieħux għalih!

Ritratt meħud minn fuq Facebook.