L-iskola tal-Ħandaq!

 

Niftakarni ċar dieħed ġo din l-iskola bħala student l-ewwel darba.  L-ambjent tal-madwar ma kienx ġdid għal kollox.  Il-fatt li missieri kien għalliem fl-istess skola kien għamilha possibli li dan il-post ġieli rajtu fil-vaganzi tas-Sajf u sakemm l-għalliema kienu għadhom jattendu.

Bħala ex-binja militari navali, l-kumpless kien jagħmilha skola totalment differenti minn dawk tradizzjonali ta' klassi fejn klassi.  Bid-differenza tal-oħrajn, t-tfal riedu jduru minn klassi għal kull suġġett.  Dan kien joħloq atmosfera unika, li bħala student kont forsi tisħet il-ħitan ta' madwarek, waqt li kif tikber kont timmisja dak kollu li kien hemm ġewwa.

L-ewwel sena f'din l-iskola kont bdejtha bil-banda.  Strajk mil-istudenti għax riedu jkeċċu lis-Sur Testa, li sa dakinhar kien surmast sa mil-bidu ta' din l-iskola.  Immaġina ftit, dan it-tifel żgħir tal-ewwel sena, iben għalliem fl-istess skola, mħeġġeġ ma jidħolx fil-klassi għal lezzjoni!  X'jibqa' fik!

L-għalliema fl-iskola, bħal binja, kienu ta' karattru uniku.  Ħafna minnhom baqgħu assoċjati mal-laqam tagħhom.  Mhux b'kattiverja, imma forsi għax il-laqam kien jiġbor fih dak kollu li student kien jassoċċja ma dik il-persuna li kien jaf minn barra.

Is-Sur Testa kien persuna meqjus żorr minn bosta, u kien kultant goff fi kliemu u ħidmietu.  Pero, anke forsi minħabba l-ħbiberija ma' missieri, kelli xorti li kont naf il-lat uman tal-persuna, u kemm kien kapaċi jkun raġel twajjeb u b'qalb taz-zokkor.  Xorta, meta ried jeżżiżni waħda, ma tantx kien qagħad lura!  Kellek ukoll persuna bħas-Sur Galea tal-P.E., magħruf bħala l-Mastro Lindo u hadida kemm fis-saħħa u fil-karattru.  Ma ridtx wisq biex jekk ma tkunx attent fil-klassi tiegħu jipprova "jixroblok l-abjad t'għajnejk bl-istraw!".  Umbgħad kien hemm is-Sur Mifsud, jew aħjar il-Makku.  Persuna ta' stoffa, imma li kellu ħabta jkeċċik mil-klassi u ftit ħin wara jispiċċa jċanfrek għaliex qed tiġġerra barra!  Kien hemm ukoll il-Maestro Schembri.  Persuna li l-mużika kont taraha fil-passjoni tiegħu lejn is-suġġett u l-lezzjoni kienet dejjem l-aktar waħda vibranti!  U fuq kollox kien hemm karattri bħas-Sur Attard, ir-Ronnie.  Persuna ta' dixxiplina kbira, li kont issibu mal-iskola kollha.  Persuna li ħarstu biss kienet biżżejjed sabiex ma niċċajtawx u ma naħlux ħin fi tnikkir żejjed.  Jekk jarak ħafif fil-ballun, is-Sur Attard għid li kien ser jħeġġek sabiex tirsisti u mhux l-ewwel darba li wasal xi student li jispiċċa fit-tim nazzjonali.

Pero il-binja u l-ambjent tal-madwar kienu uniċi ta' vera.  Malli ninżlu mil-private konna mmorru ġirja għal waħda minn noticeboards ħalli naraw x'għandna free lessons.  Umbgħad kien hemm sistema sħiħa ta' passaġġi msaqqfa ħalli jiproteġġuna mil-elementi kollha, pero dawn kienu jinbidlu fi grawnds żgħar b'xi ballun tat-tennis, probabilment misruq mil-Marsa tal-ingliżi li kienet viċin.  Il-klassijiet kollha kienu maghmrin bil-fannijiet ta' żmien l-ingliżi u bil-blackboard idur u bil-platform taħt l-għalliem!  Umbgħad kellna t-tuck-shop u l-kamra minn fejn iqassmu l-ħalib!  Laboratorji u sa kamra magħmra sew b'gym u oħra b' mudell ta' komjuter, li għal bidu tas-snin disgħin kienet xi ħaġa rari ħafna!

Imsomma, ta' tifel li kont kienet istutizzjoni li għamlitni dak li jien... u ma jiddispjaċini xejn!

Nota:  L-għalliema li semmejt, sfortunatament m'għadhomx magħna, u semmejthom bl-ebda disrispett, anzi b'rispett kbir għal ħidma kbira li ħallew warajhom.  Fuq kollox insemmi ukoll dawk l-għalliema li għadhom magħna, u li daqshom għamlu xogħol siewi u ta' valur.  Naf ħaġa waħda; hemm ġew dħalna tfal, u ħriġna rġiel u li għadna rikonoxxenti għal dak il-post sallum il-ġurnata.  Ħasra biss li minn dik l-istruttura kollha, illum ma fadal kważi xejn.