Dawra nhar l-ewwel tas-sena!

 

Tista' tgħid kienet saret tradizzjoni, li nhar l-ewwel ta-sena, eżatt wara l-ikla ta' nofsinhar, konna nerħulha għal dawra lejn in-naħa ta' fuq tal-gżira.  Ma kienux l-akwati tagħna allura, il-fatt li qed naqbdu tal-linja kollha f'daqqa u mmorru dawk in-naħat kienet xi ħaġa kbira.

Niftakar sew li dawk iż-żminijiet ma kienux daqstant popolari l-ikliet fir-ristoranti.  L-ikliet tal-Milied u tas-sena l-ġdida kienu dejjem xi ħaġa li ssir id-dar, u jekk mhux id-dar għand in-Nanna jew għand xi zija,  Msomma, kienet ġabra tal-familja kollha, u li aħna bħala kuġini kien żmien sabiħ li niltaqaw u  nilagħbu kollha flimkien.  Pero' din id-dawra wara nofsinhar kont nistenniha ħafna iktar.  Forsi illum lanqas toħlomha li tfal jieħdu pjaċir b'dawra fuq karozza tal-linja, imma dan kien żmien ieħor tassew.

Wara kedda biex nitkbu minn naħa tagħna, b'xi mod konna nibdew it-triq lejn Buġibba, li ħafna drabi kienet tkun id-destinazzjoni tagħna.  Vjaġġ fuq tal-linja kien diġa avventura...vjaġġ twil fuq tal-linja kien ġabra sħiħa ta' stejjer.  Tibda' biex sa Birkirkara karozza kienet tkun diġa mtliet, u tibda' tara bosta jxejru idejhom għalxejn għax konna nibqaw għaddejjin.  Ma' l-ewwel ċans kont niprova nieħu posti fuq is-seat ta maġemb ix-xufier.  Hemm fost is-sħana tal-magna, riħa taqsam ta' diżil u ċ-ċaqlieq tan-numru mal-ħġieġa ta' quddiem, kien l' hena tiegħi nara x-xufier jissielet ma kull gear li jdaħħal u kif kien jirnexxielu jċaqlaq dak it-trakk daqsiex.

Waqt il-vjaġġ kont tilmaħ min jissielet biex iżomm sod u ma jaqax, min nofs siequ fuq l-istaffa lest biex jaqbeż kif ix-xarabank joqrob lejn l-istage, u min mitluf f'xi posta rużarju tul il-vjaġġ kollu.  Il-bqija kont nifli d-dettalji ta' dak l-imbierek trakk.... qanpiena ippolixjata bid-daqqiet ta' kemm 'il darba indaqqet.... In God we Trust miktuba b'tant reqqa minn xi ħadd tajjeb fit-tberfil.... statwa tad-Duluri tiċċaqlaq ma' kull skoss tat-triq.... kaxxa għal biljetti użati li mar-riħ nofshom kienu jispiċċaw itiru xorta oħra fit-triq jew mal-art fit-trakk stess.  Umbad ma kienx jonqos xi barmil u xkupa taħt l-ewwel seat, u xi ġgajta żgħażagħ kollhom storbju...li snin wara spiċċajt bħalhom nixxadinja fuq l-istess mezz tat-trasport.

B'dawn l-avventuri kollha l-vjaġġ lejn Buġibba lanqas kont tarah.  Kif konna noqorbu lejn il-pjazza prinċipali kont tara ħafna moviment fost dawk li jew għajjew bilwieqfa, jew li tkissru bilqieghda u jħossu kull skoss ġo dahrom.

U minn naħa tiegħi kont nistenna biss, li nibdew it-triq lura, ħalli l-istess avventura nerġa naraha quddiemi....din id-darba nofsi bi ngħas u probabbli lanqas nintebaħ li wasalna lura d-dar!