Il-festin tal-Kappillan!

 

Niftakar meta kont żgħir, in-Nanna kienet tħobb tikteb lili u lil kuġini għal festin li kien jorganizza l-Kappillan fi żmien il-Milied.  Bħal kull sena, kont immur bosta minnhom, jew tal-każin, jew il-mużew... imsomma kienu tradizzjoni li kont inkun ħerqan mhux ħażin għalihom.  Pero, dan il-festin tal-Kappillan kien partikulari.

Il-festin kien dejjem ikun organizzat l-aħħar Sibt ta' qabel il-Milied.  Normalment kien ikun vera kmieni, u peress li n-Nanna kienet toqgħod San Ġiljan, allura l-lejl ta' qabel kont inqattaw għandha.  Id-dar tan-Nanna ma kienetx palazz imma kienet dar modesta li dejjem baqgħet f'qalbi.  Kif setgħet, kienet tarma s-salott bi ftit tiżjin li kellha.  Siġra u Bambin kienu jiddawru b'ħafna bozoz u ġulbiena, u fuqhom kienet iddendel kartolini kemm minn ta' dik is-sena u kemm minn snin passati.  Il-presepju kien wieħed sempliċi.  Kien xogħol in-Nannu, u n-Nanna kull sena kienet tarmah fejn il-bieb ta' barra.  Fih kienu jintramaw ħafna pasturi folla sħiħa quddiem l-għar, qishom qegħdin għal xi corner meeting ta' żmien Mintoff!  Magħhom kont nispiċċa nżid xi cowboy, indjani u xi suldat ġermaniż!  Msomma, sakemm ma kienetx tinduna, għalija kienu qegħdin tajjeb!  Bil-ħaqq...il-festin!

Ma sbieħ Alla, n-Nanna kienet tqajjimni ħalli nilħaq nieħu bela' kafe' daqs li kieku fejn sejjer ser nibqa' bi stonku vojt.  Il-festin ħafna drabi kien isir fl-Orpheum Theatre, il-Gzira.  Minħabba d-distanza, ħafna drabi konna ninżlu maz-ziju peress li kienu jiġu ukoll il-kuġini.

Is-sala kienet kbira, u tista' biss timaġina sala bħal dik mifquha tfal u min jiflaħ jgħajjat l-aktar.  Il-povru Kappillan kien jiprova jżomm ftit ordni minn dak l-istorbju kollu, u jibda' jrodd is-salib u jipprova jgħid xi talba ċkejkna qabel jerġa' jibda' l-kaos.  Bniet naħa u subien in-naħa l-oħra u int u dieħel jagħtuk biljett ħalli fl-aħħar tieħu r-rigal mingħand Father Christmas!

Bħal kull sena kien jitfa' film għaddej peress li s-sala fi żmien kienet talkies.  Kull sena kien jintwera' il-film klassiku Clash of the Titans, il-verżjoni tal-1981, u probabilment iċċensurat!  Film għaddej u sadatant bosta adulti jnewwlu u jqassmu l-ikel fil-fillieri kollha.  F'dak il-ftit dlam tas-sala kont issib min jieħu l-okkażjoni u s-sandwich li jkollu kien jissuttah għal faċċata, u l-istess jiġri minn naħa l-oħra.  Dan kien iwassal li f'nofs film l-attenzjoni aktar tispiċċa li ma tlaqqatx xi daqqa ta' pastizz, milli jekk Harry Hamlin hux ser jirnexxilu joqtol il-Medusa!  F'dik ix-xita ta' ikel, il-Kappillan kien ħafna drabi jwaqqaf il-film u jipprova jċanfar xi tlieta fil-filliera ta' quddiem bl-iskop li kulħadd jibża minnu.  Kull sena l-istess storja.

Kif jgħid Freddie Portelli, il-kbir dejjem ikun għadu ġej.  Ftit wara, fuq il-palk, kien jitfaċċa Father Christmas, b'sinjal ukoll li l-festin kien ikun riesaq lejn tmiemu, jew inkella l-Kappillan għajja jew xeba' jħanbaq għalxejn.  L-għajjat tat-tfal dak il-ħin kien xi ħaġa sopranaturali... min bl-eċitament, min għax spiċċa bil-qmis kollha tidlik ta' krema, u min għax jagħraf li Father Christmas mhu ħadd ħlief is-Sagristan... li bħal kull sena kien jispiċċa jibla' dak l-inkarigu li zgur mhux forsi ma kienx iħares lejh b'tant ħeġġa! 

Minn hemm konna nibdew filliera semi-ordnata ħalli nirċievu r-rigal ċkejken u tispiċċa tati bil-minkeb biex ħadd ma jieħodlok postok.  Bil-mod il-mod kif toqrob lejh, tibda' tara l-oħrajn lesti u diġa qattaw il-karta u tawk ħjiel sew ta' x'rigal qed jistennik.  Kif kont nasal ħdejn Father Christmas, wara li nxomm r-riħa taqsam ta' sigaretti, kont narah jiġġebbed għal rigal mingħand l-assistent, li daqsu ftit kien ikollu aptit dak l-istorbju, u ieħor jaħtafli l-biljett minn idi ma mmurx nerġa ndur għal xi rigal ieħor.

Kienet il-farsa ta' kull sena, u wara li b'xi mod nerġaw niltaqaw il-kuġini, noħorġu u nibdew t-triq lura għal għand in-Nanna... nidku għal dak kollu li ġara u nistennew sena oħra għal farsa oħra!