Is-Suq tal-Belt

Niftakar sew li kull meta ridna nagħmlu xirja tajba ta' ħut jew ħaxix, konna nerħulha lejn il-Belt, eżattament lejn is-Suq tal-Belt.  Il-post kien uniku, u niftakar sew li malli tidħol kienet tilqgħek ir-riħa qawwija ta' ħut u ħaxix, kollox f'daqqa.

Kien post li kien jiċċassani mhux ftit.  Il-binja kienet waħda unika, u bejn għal kobor tiegħu kif ukoll kultant kien ikun ftit imdallam, kien ftit li tistkerħu.  Żmien ilu kien meqjus bħala l-aqwa post sabiex issib dak li ridt, u fuq kollox bi prezzijiet tajba.  Pero ta' tifel li kont, qajla kien jinteressani l-prezzijiet tal-prodotti.  Kien spazju miftuh u kbir, u dak kien ifisser post kbir fejn stajt nigri mingħajr ma jwaqqafni ħadd.

Biss dawk il-ħwienet żgħar b'xi pixxispad mdendel għal tulu kien jimpressjonani mhux ftit.  Kont dejjem irid nara kif ser nagħmel u immis it-tilari kollha silġ daqs li kieku huma l-borra li kont nara biss fuq it-televixin.  Jew inkella noqgħod nara xi qarnita għadha iddur u tghaqqad fil-vaska, u tal-ħanut jaħtafha u jitfaha jerġa' għal qiegħ.  L-għajjat ma kienx jonqos.  Xi erba' nisa kollha jridu jinqdew qabel xuxlin, jew xi oħrajn iġebbdu fil-prezz u dak għax għoli wisq jew għax l-ieħor kien ser jżommli nqas.

Niftakar ukoll il-bejjiegħa tal-ħaxix.  Kaxxi fuq kaxxi b'kull tip ta' frott u ħaxix.  Ma kienx ikolli kwiet f'ġismi u kont nipprova immiss kull kaxxa u kull frotta.  Tant li iktar minn darba kont ninzerta xi wieħed minnhom li kien jaqbad xi tuffieħa, jimsaħha mesħa fil-flokk, u jitfaħa f'idi.  Kien għadu żmien li jiggustaw tifel kemm xejn imqareb u b'xagħru kollu nokkli, imma forsi ukoll kien mod kif seta' wieħed jevita' milli dan it-tifel suppost kwiet seta' jwaqqalu dik il-bejgħa kollha!

Mbgħad darba minnhom dan il-post fettilhom jagħmlu escalator.  Kien naħseb l-ewwel post f'Malta li qatt kien hawn wieħed.  Fejn qatt rajna taraġ li jitla' waħdu, u aktar tifel bħali?  Tiela' u nieżel għal mitt darba mill-inqas..logħba msomma sabiħa!  Sakemm tfaċċa xi ħadd, li qażżistlu kull m'għandu u b'daqqa ta' ċavetta waqqaf dak il-ferħ... 

M'hemmx x'tagħmel...erġa ibda' iġri minn naħa għal oħra kif kont nagħmel qabel, u mal-istorbju din id-darba żdied it-tgergir tan-nies li xtaqu jippruvaw dak l-escalator u ma setgħux... għax tort ta' xi ħadd, kien mitfi!